¿Fechu arrémente?

Llevo guardando esti cachu papel que llantaron nel cristal del coche nuna cai d'Uviéu hai dos selmanes... Güei compártolu con vós pa ver si ablucáis como abluqué yo al velu.

Ye publicidá del Llagarín de Granda. Nun sé si la intención inicial yera la de mancar, pero'l resultáu final amuesa lo que ta viviéndose nesti país gracies a les polítiques llingüístiques a les que mos tienen avezaos:
falta de normalización dafechu de la llingua, falta de compromisu d'alfabetización a la población xeneral y falta de visibilidá del asturianu pa evitar que lleve fostiazos como ésti.

Llamentablemente, esti cartelu representa lo qu'anguaño ye l'asturianu pa munchos: llingua pa facer risión.

En tou casu... ¿ye posible facelu peor? Que vos preste l'emvutíu

8-S Otra oportunidá perdida

Hai casi una selmana de la celebración de los actos del 8-S n'Asturies. Un añu más los nacionalistes que naguamos por ver xuntos a tolos políticos que pueden lluchar dende, por y p'Asturies atopamos un filera d'actos a los qu'asistir: Candás, Xixón, Uviéu... Esti 8-S foi otra oportunidá perdida pa facer del nacionalismu asturianu una opción más pa los asturianos, si bien esta vegada los esfuercios por facer daqué diferente fueron mayores.

Depués de tantos años fuera del país nesti día, decidí asistir a lo que consideraba yera l'actu que más respondía a la mio idega d'unión, pol númberu d'asociaciones, organismos y partíos convocantes: l'actu de la Plataforma 8-S en Xixón.

La mio valoración sobre esti actu, al que nun asistió PAS-URAS resúmese en llínies xenerales nuna pallabra: INSUFICIENTE. Esperaba más participación, y non sólo nesti, sinón en tolos demás actos convocaos. Esperaba sentir propuestes nueves, proyeutos de país y sólo sentí peles oreyes lo que tolos díes vemos colos nuesos güeyos. ¡Yá sabemos lo que tan faciendo con Asturies! ¡Yá sabemos que nun-yos importa un res! Pero la mera descripción de lo qu'asocede nun ye abondo: hai que dar soluciones qu'aporten dende una visión asturiana pa qu'esto entame a espoxigar.

Nun entamu valoré como positiva la non esistencia de sigles de partíos, anque tuvieren presentes y fueran los organizadores del actu. Albidro que la intención yera la de non politizar l'actu. Pero, y nesto doi-y la razón al PAS, ¡¡ye un actu políticu!!

Una cosa ye'l non querer facer l'actu partidista y otra ye'l non querer facer d'un actu políticu daqué político.Un actu organizáu pol nacionalismu asturianu y que nun fai visibles a los referentes politicos qu'ellí taben caltién invisible la opción nacionalista pa la sociedá.

Visibilidá o morrer

Hai varios años una importante asociación en defensa de los derechos de los homosexuales fizo una (perbona, na mio opinión) campaña nomada "Visibilidá". Esa campaña sirvió pa que'l coleutivu gai tuviera presencia nos medios, que l'alderique al rodiu de la so situación surdiera per dayures. Esa campaña dio visibilidá a daqué qu'hasta esi intre yera en ciertu mou tabú, arrequexao, escondio. Y los prexuicios p'hacia lo desconocío, fuxeron.

Con esti simil pienso agora d'un lláu nel ser nacionalista y, d'otru, nel nacionalismu.

Ser nacionalista. "Yo soi nacionalista", sí, dígolo onde faiga falta y davezu en círculos non nacionalistes, y la xente abluca una vegada, a lo más dos, pero a la tercera asumen como tal que la mio opción política ye'l nacionalismu, sin prexuiciu de tener que sentir davezu nomatos como'l de freaky o radical. Pero ehí tal llabor individual de caún pa facer ver a esos ablucaos qu'esiste vida al marxe de lo qu'ellos tienen asumío como "normal".

Nacionalismu. Nesti sen hai tabúes a esgaya y anoxu abondu, ensin escaecer les voces xabaces antinacionalistes que pretenden espardir un mensaxe apocalípticu-dramáticu sobre tolo que tien arume nacionalista. ¿Qué fai entós el nacionalismu asturianu, el políticu, el de grupu pa baltiar esta imaxe inxusta y lladina que munchos medios, persones y políticos s'encarguen de tresmitir? Nel meyor de los casos, engarrase ente ellos. Nel peor, cartelos con lemes y dibuxos que poco ayuden.

Pa esti nacionalista, que nin milita nin tien relación con partíu dalu y que vota acordies col so sentir de país y la so ideoloxía, los partíos nacionalistes tienen un deber pa colos votantes que nun son militantes, ye dicir, la mayor parte de los votos que reciben. Y esi deber ye'l de dar una imaxe seria; el d'amosar una alternativa de país y un proyeutu pal cambéu; el d'anteponer una ideoloxía, un país, Asturies, a unes sigles; el de dexar de mirar pa la so organización como si d'un grupu collacios se tratare y d'entamar a pensar que pueden ser un referente pa xente que nin tan siquiera conocen y que los vota dándo-yos una confianza que muches vegaes se ve frañada por asuntos que pal nacionalista independiente son ayenos y difícilmente entendibles.

En definitiva, los partíos políticos asturianos tienen la responsabilidá de normalizar y facer visible'l nacionalismu en toles estayes de la vida asturiana con dignidá, seriedá y respetu p'hacia los sos votantes. Y éstos, el de fuxir de la endogamia que tien el nacionalismu asturianu y el d'amestase a un proyeutu enantes qu'a una sigla.

Y dambos, partíos y votantes, el de facer ver a tola sociedá qu'esta opción ye válida, seria y resolutiva. D'esta miente, algamaráse la presencia nos medios, crearáse l'alderique y saldráse de lo tabú pa convertise n'alternativa visible.

A vueltes col blogue

Ya pasó tiempu dende la última vegada que les tecles del ordenador ficieron por qu'esti blogue tuviere una entraduca más. ¿Por qué? Coses de la falta tiempu,d'un lláu, y de la galbana, per otru.

Pero ya ye tiempu de tornar. Nun soi yo una persona a la que-y preste especialmente'l mundu virtual, les redes sociales (virtuales) o los nomatos usaos pa ferir a los demás faciendo usu d'un anonimatu rastreru.

Esti blogue entamó por un motivu: la señaldá; paró por otru, como dixi enantes: la galbana; y vuelve por otru: el repunu.

Señaldá, cuando ún ta lloñe del llar onde quier tar.

Galbana, cuando'l tiempu pasa, los llugares cambien, la xente marcha.

Repunu, cuando ún, ya tornáu al so país, ve que la indiferencia de la xente, la so falta de criteriu y la manipulación de la so opinión tan más qu'a la orde del día. Y que cuando daquién quier facer por qu'ello camude, entós, surden los vieyos mieos y los inesplicables movimientos que traten de baltiar too aquello qu'arrecienda a asturiano.

Y, aun a pesar de lo virtual d'un blogue, paez necesario tornar. Bones de nuevo.

L'alternativa

«Hay que disolver IU, el Bloque y Los Verdes para crear una fuerza que aglutine a toda la izquierda alternativa al PSOE»

La coalición que fixeron nel so día Izquierda Xunida y el Bloque por Asturies pudo esconsonar ilusiones nun entamu a los que creyeron qu'ello diba derivar nuna verdadera alternativa al PSOE. Por embargu, esta xuntanza nun fizo más qu'esborriar la credibilidá d'IX y sentenciar al BpA. Esti tipu de simbiosis, que tamién se da notres dómines con más ésitu, nun furruló -y nun ta furrulando- n'Asturies. Y ello porque los sos integrantes nunca nun supieron defender los postulaos básicos que dambos glayaben cuando entá yeren solteros. Serán coses del matrimoniu...¡un tien que renunciar a tantes coses pa tener contenta a la otra parte que nengún fai lo que de verdá quier!

El plantegar la disolución d'IX y del Bloque ye una opción acertada si se fai col envís de construir una alternativa creyible a los partidos mayoritarios asturianos.

Esa alternativa tien d'amosar obligatoriamente un cálter conciliador y integrador con tola clas política asturiana nun representada anguañu por partíu políticu dalu y que cae nel mesmu espectru políticu qu'aquella pretende ocupar.Y ye responsabilidá de tolos involucraos l'amosar que se ye capaz de renunciar a munches coses por facer, daveres, un proyeutu grande, seriu y, sobre too, creyible.

La idea de Valledor tien de rescamplar darréu n'IX, Bloque, UNA y Andecha. El saber renunciar, el saber falar, el saber negociar y el saber trabayar xuntos ye lo que vos dará credibilidá y reconocencia y averarávos a la oportunidá qu'Asturies necesita. D'otramiente, toos seremos cómplices y partícipes del fracasu de la alternativa.

Pola unidá llingüística

Asociar la defensa d'una llingua col tener una determinada ideoloxía política particular ye un argumentu que vien siendo usáu davezu polos que nagüen pol desaniciu de tolo que nun arreciende a castellán.

Si a ello-y amestamos el fácil y mancante discursu de teoríes espansionistes, tenemos entós el compangu perfeutu pa entamar un frente ideolóxicu capaz d'espardise como la pólvora y semar desconfianza ente la xente.

Y ye un discursu tan potente que contamina incluso a los que tan o debieren tar nel mesmu barcu que nun ye otru que'l de los que naguamos por que tal desaniciu nunca nun llegue a facese realidá. Pero lo cierto ye que l'Asociación de Profesores y Monitores de Llingua Llïonesa acusa a l'Academia de la Llingua Asturiana d'espansionista por andechar nun cursu entamáu en Ponferrada.

L'esfuerzu que munches asociaciones y xente a títulu personal fai en defensa de la llingua asturlleonesa nun pue tener como recompensa la división ente los d'un lláu y l'otru del cordal, másime cuando esta defensa quier ser dafechu arrequexada polos mandamases de dambos llaos. Mandamases que ven con risión cómo les griesques en so barcu enemigu van terminar por fundilu ensin ellos gastar un cartuchu.

Hai que dar un sofitu a tolos actos fechos col envís de caltener viva la llingua ensin condiciones, entámelos quien los entame, seya onde seya. Porque si la cordal nos separa, xúnenos la llingua y les ganes de lluchar con ella, por ella.

La maza nun ye'l camín

Les lleis han tar penriba'l güeyu por güeyu, diente por diente. Los mazazos han dase per aciu de golpes de xusticia, sentencies y condenes; porque los mazazos físicos nun faen más que valtar los pegollos d'un sistema que tien de tener como finxu cimeru qu'escontra la violencia nun cabe violencia. Poro, la maza nun ye'l camín.