"¡Que vien la muga!" o una coreana na Xuncarosa

Esto ye una hestoria verídica, qu'asocedió na Xuncarosa:

Fai tanto como tiempu hai que pasaron los años 50 del sieglu pasáu. Una familia a la gueta'l suañu que la siderurxa de les Asturies ufiertaba crució les montañes dende Castiella p'asitiase na Xuncarosa.

Trabayu nun faltaba pero les perres nun sobraben. L'home colaba tolos díes prau p'abaxo pala Ensidesa. La muyer, pa que tola familia pudiere facer usu del "drechu a cocina" de la casa alquilada, llavaba la so ropa, la de la fía y la del home xunta la propia de los caseros que los acoyíen.

La ropa llavábase en ríu. Y al ríu llegábase cruciando praos col barreñu ropa na tiesta y madreñes nos pies. Si les fuerces sobraben, sacábase provechu del viaxe pa llevar a casa calderos d'agua, ente la má y la fía. Anque ello nun yera tarea fácil pa dos castellanes con madreñes.

Nunu de los munchos díes murnios de nublina, d'esos nos que salir de casa yera pola obligación de facelo, la muyer empobinóse sola p'hacia'l ríu, calderu ropa na tiesta, madreñes nos pies. En saliendo de casa, la casera fízo-y la primer alvertencia: "Cuidáu cola muga" y la coreana coló prau p'abaxo. Nel camín, yera fácil atopar otres muyeres y homes faciendo los sos trabayos. Poquiñín a poco, el contautu diariu entamó a crear amistaes qu'anguaño entá se caltienen. Pero esi día, la xente paecía nun querer dexase ver.

En llegando al ríu, un home, con voz de fatiga, nun tardó en dici-y a la probe:

"Señora, ¿onde va? Nun ve que vien la muga"



La señora, acelerando'l pasu y alcordandose de lo que la casera-y alvirtiere al salir de casa, dio priesa pa llavar la ropa. Mentanto, dos homes en caballería, al vela, tornaron a insistir:

"¡Que vien la muga!"

La probe señora metió la ropa en barreñu y, cuando diba enfilar prau p'arriba, la inoportuna nublina d'esi día entamó a soltar orbayu. Pero esa mañana, el prau nun paecía tar empináu pa la muyer.. nun podía perder nin un minutu, la muga taba por venir.

Güei esa coreana, dende la so casa a la vera esi mesmu ríu, cúnta-y al so ñetu, el qu'esto escribe, les vivencies de la so mocedá nuna Asturies que tenía trabayu, suaños, muga y Xuncarosa.

Saludos güelina.

Dos años depués...

Y pasaron dos años. Nun puedo dicir que colara por tabacu, porque nun fumo. Simplemente colé, desapaecí. Pero ya toi equí otra vuelta, dos años depués... ¡y vaya panorama!

¿Qué paso tou esti tiempu? Daquién contome qu'hebo un furacán hai dellos díes... pero ¿pa tanto foi que fizo españar la burbuxa inmobiliaria? Si ya veíase venir cuando colé... aquello nun yera a caltenese por muncho. Alcuérdome de la xente faciendo planes de futuru y negociu queriendo mercar y vender pisos de contino, parceles nesti tarrén y praos nesti otru... ¡boooooooooom! Y los restos de la esplosión espardiéronse tanto que la onda espansiva baltió los tipos d'interés, los precios y ¡mamina! l'emplegu... ¿Cásique 4 000 000 de paraos que s'esperen nel Estáu? Pero si cuando colé dixéronme que dibamos algamar el plenu emplegu... ¡Seré inocente! Yo qu'albidraba que les empreses diben tar peleándose por mi y resulta que ye'l bancu'l que lo fai pa que-yos meta'l dineru...

Con esta folixa nun sé si merez más la pena colar otros dos años...

Día Mundial del Mediu Ambiente

Güei celébrase'l Día Mundial del Mediu Ambiente. Y entrugome yo...¿qué ye lo que hai que celebrar? ¿la enerxía de más gastada de mou innecesariu? ¿la cantidá de contaminantes que dende cuantayá colen a l'atmósfera? ¿que, en teniendo coche, naide nun usa'l tren o l'autobús?

A naide-y presta que-y camuden los sos hábitos. La defensa del ambiente ta faciéndose dende una perspectiva que nun tien en cuenta l'egoísmu natural de la raza humana. Poro, dende la mio opinión, si el desaniciu del mediu ambiente tien torna alguna y ésta supón el sacrificiu de la xente, nunca seremos quien a algamala.

Ye más fácil metelo too nuna bolsa basoria que separtar en tres dsitintes. Ye más cómodo garrar el coche qu'esperar 15 o 20 minutos por un autobús o un tren que,d'otramiente, van tardar en llevate al to destín munchu más tiempu. Ye más barato usar diesel que gasolina, anque ésta contamine menos. Ye más barato'l diesel convencional qu'el biodiesel, etc, etc....

Y mientras esto siga siendo asina nun albidro ésitu nengún al caltenimientu del mediu ambiente, que como'l so propiu nome diz, enteru ya nun tá.

A "don" Luis Solares

Si depués de los fechos qu'asocedieron na pasada foguera de S.Xuan en Tresona, y que vienen de ser comunicaos pol grupu Felpeyu, tuvieras la dignidá y la vergoña d'una persona de bien, saldríes a la cai cola tiesta mirando al suelu y nun se te pasaría por ella el presentate como candidatu a l'alcaldía d'un conceyu, Corvera, nel que, gracies a la to xestión y a los que la sofitaben, l'actividá cultural xorreciente que tenía, morrió.

Pero quiciás una persona tan prepotente, engreída y grandona como tú nun seya a reconocer los sos errores. Vergoña y noxu dame como corverán tener a una persona como tú de representante na mio casa conceyu. Vergoña y noxu dame'l to pasu pola alministración d'esti conceyu. Vergoña y noxu daríame que siguieras nelli.

Perdona si nun me salen palabres políticamente correutes; anque tampoco nun creo que vaya importate muncho. La incorreición polític ye daqué de lo que debes saber asgaya.

Alón..

Asturies y les bicicletes urbanes

N'Asturies hai una afición pergrande al cicloturismu, tanto de carretera como de montaña. Pero...¿y les bicicletes urbanes? ¿Vese davezu a daquién a les 7 la mañana en bicicleta pela cai camín del trabayu? ¿Ye habitual ver bicicletes enfrente un supermercáu mientres el so amu ta mercando dientro? La respuesta ye clara, non.

La orografía asturiana nun ayuda a dir en bicicleta d'un pueblu a otru o d'una ciudá a otra, sobre too pa los folgazanes, ente los qu'inclúise quien esto escribe; y los gobernantes de turnu nun ayuden a que dir en bicleta per un trayectu urbanu nun sea cuestión de xugase la vida.

Durante dellos meses viviendo en Flandes descubrí lo util que puede llegar a ser la bicicleta; lo fácil que pue llegar a facete la vida un vehículu de dos ruedes que non solo nun consume, sinon que, amás, ye saludable.Entá queda abondo que deprender d'otros llares, nin más nin menos avanzaos qu'el de nueso, como Bélxica o los Países Baxos. Nesti tiempu que cuerre nel que les copies de lo que faen los demás tan a la orde'l día, bien podíen los nuesos gobernantes copiar d'estos llugares o, si nun quieren dir tan lloñe, de ciudaes más cerquina de nós, como, por exemplu, Donostia.

Pero dame a mi que l'algamar na sociedá d'Asturies el grau d'integración que la bicicleta tien n'otres dómines ye cuestión d'inxeniería d'elite. Preba d'ello ye la estúpida prohibición que tienen les bicicletes de circular per víes peatonales. Y cuida que nun sea un policía playu quien te vea pela Cai Corrida de Xixón... porque si non prepara varios cientos d'euros de multa o vete a l'alcaldesa a roga-y que te la quite.

La solución pa les bicicletes pasa pola creación de carriles bici non sólo en delles cais, sinon en tol entramáu urbanu de les ciudaes, lo qu'inclúi rotondes, cais peatonales, parques, avenides y carreteres periurbanes, coles correspuendientes "places d'aparcamientu". Mentantu esto nun se faiga, cualquier intentu de querer potenciar la bicicleta será en vanu, pues naide, yo'l primeru, ta dimpuestu a arriesgar la so vida saliendo a la selva de coches y camiones que pue atopase nes nueses ciudaes.


Publicar

Second Life

Atopo güei na prensa una noticia que vien de dexame más qu'ablucáu. Les autoridaes alemanes investiguen un casu de pederastia nel mundu virtual Second Life.

¡Meca!... pónense a inventar un mundiu nuevu y ya va camín de tener lo meyor d'esti que mos tocó vivir. Nun-yos val con pagar munchos euros reales por un tarrén virtual; nin con sentir a los polítiquinos fashion dar dicursinos virtuales en cafeteríes virtuales. Agora tamién danse casos de pederastia virtual. Vaya capacidá d'invención... eso ye orixinalidá ¿Lo prósimo? Camiento que nun tardarán en dir famosos a la cárcel o q n'apaecer políticos con negocios sucios nes islles paradisíaques d'esi nuevu mundu. ¡Vaya un inventu!

Ante esti panorama, casi que voi esperar que llegue la mio Second Life. Anque nella muncha vida de xuru que nun habrá. Eso sí, tranquilu tarelo bastante, ensin esmolecimientu dalu.

Campaña...comercial

Dos díes pal disparu salida de la carrera política na que a tolos participantes prestaría-yos quedar ganadores: la campaña electoral.

Campaña electoral, esi tiempu nel que'l nun sentir falar de promeses o d'idegues rayando lo utópico abúltase complicao. Esi tiempu nel que saber vender (o saber facer creer) lo bono del productu ye condición sine qua non p'asegurase un puestu ganador.

Y falando del asuntu comercial, si les anuncies de los participantes nes campañes electorales tuvieren el mesmu xeitu que les campañes publicitaries comerciales, nun soi quién a albidrar la cantidá d'asteriscos (*) que tendríen que poner nos cartelos. Camiento que de xuru atoparíemos coses como estes:

"Creemos en Asturias*"

"Vas ganar"**

"Confianza en el futuro"***

* Queda excluido el territorio comprendido, de oeste a este, entre la ría del Eo y la ría de Tina Mayor y, de norte a sur, entre el mar Cantábrico y la Cordal Cantábrica.

** Bases del concursu depositaes en secretu ante notariu. En casu de nun quedar premios, negociaráse ún de menor valor.

*** Donde hay confianza, da asco.

Lo meyor, como colos comercios, ye fuxir de multinacionales globalizadores y quedase colos de casa, que nun tien estrelluques nin lletra pequeña. Esos son los que de verdá creen, colos que de verdá se gana y los que sí dan confianza.