Día Mundial del Mediu Ambiente

Güei celébrase'l Día Mundial del Mediu Ambiente. Y entrugome yo...¿qué ye lo que hai que celebrar? ¿la enerxía de más gastada de mou innecesariu? ¿la cantidá de contaminantes que dende cuantayá colen a l'atmósfera? ¿que, en teniendo coche, naide nun usa'l tren o l'autobús?

A naide-y presta que-y camuden los sos hábitos. La defensa del ambiente ta faciéndose dende una perspectiva que nun tien en cuenta l'egoísmu natural de la raza humana. Poro, dende la mio opinión, si el desaniciu del mediu ambiente tien torna alguna y ésta supón el sacrificiu de la xente, nunca seremos quien a algamala.

Ye más fácil metelo too nuna bolsa basoria que separtar en tres dsitintes. Ye más cómodo garrar el coche qu'esperar 15 o 20 minutos por un autobús o un tren que,d'otramiente, van tardar en llevate al to destín munchu más tiempu. Ye más barato usar diesel que gasolina, anque ésta contamine menos. Ye más barato'l diesel convencional qu'el biodiesel, etc, etc....

Y mientras esto siga siendo asina nun albidro ésitu nengún al caltenimientu del mediu ambiente, que como'l so propiu nome diz, enteru ya nun tá.

A "don" Luis Solares

Si depués de los fechos qu'asocedieron na pasada foguera de S.Xuan en Tresona, y que vienen de ser comunicaos pol grupu Felpeyu, tuvieras la dignidá y la vergoña d'una persona de bien, saldríes a la cai cola tiesta mirando al suelu y nun se te pasaría por ella el presentate como candidatu a l'alcaldía d'un conceyu, Corvera, nel que, gracies a la to xestión y a los que la sofitaben, l'actividá cultural xorreciente que tenía, morrió.

Pero quiciás una persona tan prepotente, engreída y grandona como tú nun seya a reconocer los sos errores. Vergoña y noxu dame como corverán tener a una persona como tú de representante na mio casa conceyu. Vergoña y noxu dame'l to pasu pola alministración d'esti conceyu. Vergoña y noxu daríame que siguieras nelli.

Perdona si nun me salen palabres políticamente correutes; anque tampoco nun creo que vaya importate muncho. La incorreición polític ye daqué de lo que debes saber asgaya.

Alón..

Asturies y les bicicletes urbanes

N'Asturies hai una afición pergrande al cicloturismu, tanto de carretera como de montaña. Pero...¿y les bicicletes urbanes? ¿Vese davezu a daquién a les 7 la mañana en bicicleta pela cai camín del trabayu? ¿Ye habitual ver bicicletes enfrente un supermercáu mientres el so amu ta mercando dientro? La respuesta ye clara, non.

La orografía asturiana nun ayuda a dir en bicicleta d'un pueblu a otru o d'una ciudá a otra, sobre too pa los folgazanes, ente los qu'inclúise quien esto escribe; y los gobernantes de turnu nun ayuden a que dir en bicleta per un trayectu urbanu nun sea cuestión de xugase la vida.

Durante dellos meses viviendo en Flandes descubrí lo util que puede llegar a ser la bicicleta; lo fácil que pue llegar a facete la vida un vehículu de dos ruedes que non solo nun consume, sinon que, amás, ye saludable.Entá queda abondo que deprender d'otros llares, nin más nin menos avanzaos qu'el de nueso, como Bélxica o los Países Baxos. Nesti tiempu que cuerre nel que les copies de lo que faen los demás tan a la orde'l día, bien podíen los nuesos gobernantes copiar d'estos llugares o, si nun quieren dir tan lloñe, de ciudaes más cerquina de nós, como, por exemplu, Donostia.

Pero dame a mi que l'algamar na sociedá d'Asturies el grau d'integración que la bicicleta tien n'otres dómines ye cuestión d'inxeniería d'elite. Preba d'ello ye la estúpida prohibición que tienen les bicicletes de circular per víes peatonales. Y cuida que nun sea un policía playu quien te vea pela Cai Corrida de Xixón... porque si non prepara varios cientos d'euros de multa o vete a l'alcaldesa a roga-y que te la quite.

La solución pa les bicicletes pasa pola creación de carriles bici non sólo en delles cais, sinon en tol entramáu urbanu de les ciudaes, lo qu'inclúi rotondes, cais peatonales, parques, avenides y carreteres periurbanes, coles correspuendientes "places d'aparcamientu". Mentantu esto nun se faiga, cualquier intentu de querer potenciar la bicicleta será en vanu, pues naide, yo'l primeru, ta dimpuestu a arriesgar la so vida saliendo a la selva de coches y camiones que pue atopase nes nueses ciudaes.


Publicar

Second Life

Atopo güei na prensa una noticia que vien de dexame más qu'ablucáu. Les autoridaes alemanes investiguen un casu de pederastia nel mundu virtual Second Life.

¡Meca!... pónense a inventar un mundiu nuevu y ya va camín de tener lo meyor d'esti que mos tocó vivir. Nun-yos val con pagar munchos euros reales por un tarrén virtual; nin con sentir a los polítiquinos fashion dar dicursinos virtuales en cafeteríes virtuales. Agora tamién danse casos de pederastia virtual. Vaya capacidá d'invención... eso ye orixinalidá ¿Lo prósimo? Camiento que nun tardarán en dir famosos a la cárcel o q n'apaecer políticos con negocios sucios nes islles paradisíaques d'esi nuevu mundu. ¡Vaya un inventu!

Ante esti panorama, casi que voi esperar que llegue la mio Second Life. Anque nella muncha vida de xuru que nun habrá. Eso sí, tranquilu tarelo bastante, ensin esmolecimientu dalu.

Campaña...comercial

Dos díes pal disparu salida de la carrera política na que a tolos participantes prestaría-yos quedar ganadores: la campaña electoral.

Campaña electoral, esi tiempu nel que'l nun sentir falar de promeses o d'idegues rayando lo utópico abúltase complicao. Esi tiempu nel que saber vender (o saber facer creer) lo bono del productu ye condición sine qua non p'asegurase un puestu ganador.

Y falando del asuntu comercial, si les anuncies de los participantes nes campañes electorales tuvieren el mesmu xeitu que les campañes publicitaries comerciales, nun soi quién a albidrar la cantidá d'asteriscos (*) que tendríen que poner nos cartelos. Camiento que de xuru atoparíemos coses como estes:

"Creemos en Asturias*"

"Vas ganar"**

"Confianza en el futuro"***

* Queda excluido el territorio comprendido, de oeste a este, entre la ría del Eo y la ría de Tina Mayor y, de norte a sur, entre el mar Cantábrico y la Cordal Cantábrica.

** Bases del concursu depositaes en secretu ante notariu. En casu de nun quedar premios, negociaráse ún de menor valor.

*** Donde hay confianza, da asco.

Lo meyor, como colos comercios, ye fuxir de multinacionales globalizadores y quedase colos de casa, que nun tien estrelluques nin lletra pequeña. Esos son los que de verdá creen, colos que de verdá se gana y los que sí dan confianza.

Ye - endes urbanes

¡Internet! ¡Qué gran ferramienta pa tar cao del mio llar, na casa gris, na señaldá.

Por fin güei, depués de 2 meses desaniciáu de tou contautu col cibermundu, vuelvo a poder tener la posibilidá d'averame a elli. Y como toa lleenda urbana que se precie, los primeros bits d'información qu'entraron pel router foron bits que trayíen información recién sacao del fornu la tierrina... ¡aiiiii...tierrina!

¡Qué prestoso l'atopar ente les noticies que daquién piensa nes lleendes! ¡Agora un cabezaleru d'un ppartíu piensa en nós y quier llevanos de vuelta'l país! Mentanto, seguiremos fuera y pagando portalgu (que sí, qu'entá hai que pagalu güelín...) cada vegada que mos pete -o mos dexen- dir.

La verdá que ser lleenda urbana... o rural... tien daqué de prestoso. ¿Acaso diba tener tanta emoción si non el baxar el puertu Payares; acaso diben entranos esos respigos diendo pel Güerna y ponésenos esa carina de felicidá al lleer esi cartelucu verde con lletres blanques dando anuncia de que ¡ya llegamos! ?

Pero lo peor de tar na lleenda ye que, una vegada tres otra, l'adiós llega. Tolos domingos, tolos meses o a la fin de feches sañalaes... Entós, esi Puertu Payares que mos allumaba col blanco la ñeve, o esi Valle'l Güerna que mos recibía amosandonos dende les Ubiñes hasta l'Aramu tornense aliaos del adiós y meten dientru'l nuesu cuerpu el peor de los sentimientos: la señaldá.

Pa toles lleendes urbanes.
Pa que dalgún día, ceo, el tornar a Asturies nun seya l'entamu, sinon la fin de les vacaciones.

Identidá

Nome, apellíos, edá.

Persona.Identidá.

Llingua, cultura, pueblu.

País. Identidá.

Ca Triskelo. Afáyate.