Virus FSA. Epidemia.

Cuando un discursu políticu ta agotáu, cuando una situación supera hasta los más optimistes d'una formación política y sobre too, cuando nun se ve la paya en güeyu propiu, entós salten les declaraciones más contradictories, infames, ruines e inadmisibles qu'un políticu pue dicir. Y sí, refiérome a les guapes pallabres de Fernando Lastra.

Que la FSA nun tenga arguyu dalu por ser asturianu nun m'abluca, de fechu, lo ablucante sería lo contrario.

"el orgullo de sentirse asturiano o de sentirse catalán o de sentirse alemán lleva a situaciones muy complicadas"

Nun fai falta que la FSA ratifique les sos postures antiasturianistes de toos enforma conocíes, pero ¿ye necesario relacionar colos catalanes el sentimientu asturianu? ¿acaso la meyor forma de proponer avances p'Asturies ye crear enfrentamientu onde nun lu hai? ¿acaso ye que nun hai proyeutu de la FSA p'Asturies? Con esi pocu arguyu d'asturianos agora entiendo por qué tamos como tamos.

D'estrema-derecha ye lo que fai'l PSOE nes sos files internes. ¿Será qu'el señor Lastra nun se da por enteráu o simplemente que nun quier decatase d'ello?

Lastra:

- ¿Nun ye d'estrema-derecha echar a xente de les mocedaes del so partíu por caltener idees contraries a les de los sos dirixentes, especialmente si éstes son de calter asturianista? ¿Y espulsalos de les formes más nazis, con menaces y demás? Sí, a lo meyor debería de falar colos dirixentes de les mocedaes que tanto deprende de los sos "caudillos". ¿Nun ye esto d'estrema-derecha?

- ¿Nun ye d'estrema-derecha acallar como sea les voces favorables a la oficialidá dientru del so partíu?

- ¿Nun ye d'estrema-derecha poner en puestinos namás qu'amigos que cayen la boca y consienten tolos tinglaos que tenéis montaos?

- ¿Nun ye d'estrema-derecha saltase les lleis, les normes y les sentencies xudiciales?

- ¿Nun ye d'estrema-derecha camudar les lleis pa que les illegalidaes tornen llegales?

- Y... ¿nun ye d'estrema-derecha querer facer desapaecer una cultura, una llingua, un pueblu?

Sr. Lastra, nun sé cuál ye l'especialista que tien que tratar el virus FSA. Pero'l día que la melecina descubra la pastillina afayadiza, Asturies saldrá de la UCI.

Doble d'anestesia, por favor.

Agora resulta qu'un paisanu nomáu Cascos tien una concencia de país d'Asturies más grande que la mía. Bono, ya se sabe como son los políticos que güei ye sí y mañana non. Na, nun me quita'l suañu.

¡Ai manín! Pero'l problema ye qu'agora la mayoría de los asturianos tamién tienen esi sentimientu más desendolcáu que yo... ¿tará pasando l'efeutu d'una anestesia que nun sabía que tenía puesto? ¿tantu tiempu sintiéndome foriatu nel mio país y agora resulta que ta too amestao d'un día pa otru?

Lo d'Asturies ye de traca. Resulta qu'el sentir mayoritariu ye qu'esti país necesita una opción política asturianista fuerte y agora la xente de la cai personifícala nuna persona que nunca nun tuvo'l más minimu enclín pol asturianismu.

Tengo de reconocer que la llegada de Cascos esmolecíame poco, más bien prestábame pol terremotu políticu que diba ocasionar nes files d'un partíu que por munchos motivos nun me presta un res. Pensaba qu'ello diba beneficiar la oportunidá de los partíos asturianistes pero l'otru día pasóme lo que vos voi cuntar.

Resulta qu'una persona que yo consideraba asturianista y bien lloñe política y ideolóxicamente de los postulaos de Cascos falaba de la posibilidá de votalu. Nun yeren los santos inocentes. Clisáu pa elli entrugué-y si yera verdá lo que decía y la rempuesta foi "Si, ye lo que necesita Asturies, una opción fuerte que saque a too esti fardaxáu de chupones, renovación, xente nuevo, con fuerza, con imaxe".

¡¡¡vamos ver!!! ¿Pero ye que Cascos ye xente nuevo? ¿Pero ye qu'Asturies entá pue ser convencío por discursos cuadonguistes-pelayistes y por persones qu'agora faense pasar por Xovellanos de pro?

¿Qué ta faciendo mal l'asturianismu políticu pa que nun tea consideráu como opción real? ¿Cómu ye posible que miles de persones pongan les esperances de cambéu nuna personalidá caduca, inclusu dientru de les files asturianistes ufiertándo-y posibilidaes?

¿Acaso la maniobra de Cascos faise por miéu al nacionalismu, pa contrarrestalu, precisamente agora que tien oportunidaes reales, inclusu si ello supón desaniciar la organización política mayoritaria de la oposición n'Asturies?

Nun entiendo'l mio país. Quiero seguir cola anestesia puesta, pero por favor, ¡¡¡dosis doble!!

¿Fechu arrémente?

Llevo guardando esti cachu papel que llantaron nel cristal del coche nuna cai d'Uviéu hai dos selmanes... Güei compártolu con vós pa ver si ablucáis como abluqué yo al velu.

Ye publicidá del Llagarín de Granda. Nun sé si la intención inicial yera la de mancar, pero'l resultáu final amuesa lo que ta viviéndose nesti país gracies a les polítiques llingüístiques a les que mos tienen avezaos:
falta de normalización dafechu de la llingua, falta de compromisu d'alfabetización a la población xeneral y falta de visibilidá del asturianu pa evitar que lleve fostiazos como ésti.

Llamentablemente, esti cartelu representa lo qu'anguaño ye l'asturianu pa munchos: llingua pa facer risión.

En tou casu... ¿ye posible facelu peor? Que vos preste l'emvutíu

8-S Otra oportunidá perdida

Hai casi una selmana de la celebración de los actos del 8-S n'Asturies. Un añu más los nacionalistes que naguamos por ver xuntos a tolos políticos que pueden lluchar dende, por y p'Asturies atopamos un filera d'actos a los qu'asistir: Candás, Xixón, Uviéu... Esti 8-S foi otra oportunidá perdida pa facer del nacionalismu asturianu una opción más pa los asturianos, si bien esta vegada los esfuercios por facer daqué diferente fueron mayores.

Depués de tantos años fuera del país nesti día, decidí asistir a lo que consideraba yera l'actu que más respondía a la mio idega d'unión, pol númberu d'asociaciones, organismos y partíos convocantes: l'actu de la Plataforma 8-S en Xixón.

La mio valoración sobre esti actu, al que nun asistió PAS-URAS resúmese en llínies xenerales nuna pallabra: INSUFICIENTE. Esperaba más participación, y non sólo nesti, sinón en tolos demás actos convocaos. Esperaba sentir propuestes nueves, proyeutos de país y sólo sentí peles oreyes lo que tolos díes vemos colos nuesos güeyos. ¡Yá sabemos lo que tan faciendo con Asturies! ¡Yá sabemos que nun-yos importa un res! Pero la mera descripción de lo qu'asocede nun ye abondo: hai que dar soluciones qu'aporten dende una visión asturiana pa qu'esto entame a espoxigar.

Nun entamu valoré como positiva la non esistencia de sigles de partíos, anque tuvieren presentes y fueran los organizadores del actu. Albidro que la intención yera la de non politizar l'actu. Pero, y nesto doi-y la razón al PAS, ¡¡ye un actu políticu!!

Una cosa ye'l non querer facer l'actu partidista y otra ye'l non querer facer d'un actu políticu daqué político.Un actu organizáu pol nacionalismu asturianu y que nun fai visibles a los referentes politicos qu'ellí taben caltién invisible la opción nacionalista pa la sociedá.

Visibilidá o morrer

Hai varios años una importante asociación en defensa de los derechos de los homosexuales fizo una (perbona, na mio opinión) campaña nomada "Visibilidá". Esa campaña sirvió pa que'l coleutivu gai tuviera presencia nos medios, que l'alderique al rodiu de la so situación surdiera per dayures. Esa campaña dio visibilidá a daqué qu'hasta esi intre yera en ciertu mou tabú, arrequexao, escondio. Y los prexuicios p'hacia lo desconocío, fuxeron.

Con esti simil pienso agora d'un lláu nel ser nacionalista y, d'otru, nel nacionalismu.

Ser nacionalista. "Yo soi nacionalista", sí, dígolo onde faiga falta y davezu en círculos non nacionalistes, y la xente abluca una vegada, a lo más dos, pero a la tercera asumen como tal que la mio opción política ye'l nacionalismu, sin prexuiciu de tener que sentir davezu nomatos como'l de freaky o radical. Pero ehí tal llabor individual de caún pa facer ver a esos ablucaos qu'esiste vida al marxe de lo qu'ellos tienen asumío como "normal".

Nacionalismu. Nesti sen hai tabúes a esgaya y anoxu abondu, ensin escaecer les voces xabaces antinacionalistes que pretenden espardir un mensaxe apocalípticu-dramáticu sobre tolo que tien arume nacionalista. ¿Qué fai entós el nacionalismu asturianu, el políticu, el de grupu pa baltiar esta imaxe inxusta y lladina que munchos medios, persones y políticos s'encarguen de tresmitir? Nel meyor de los casos, engarrase ente ellos. Nel peor, cartelos con lemes y dibuxos que poco ayuden.

Pa esti nacionalista, que nin milita nin tien relación con partíu dalu y que vota acordies col so sentir de país y la so ideoloxía, los partíos nacionalistes tienen un deber pa colos votantes que nun son militantes, ye dicir, la mayor parte de los votos que reciben. Y esi deber ye'l de dar una imaxe seria; el d'amosar una alternativa de país y un proyeutu pal cambéu; el d'anteponer una ideoloxía, un país, Asturies, a unes sigles; el de dexar de mirar pa la so organización como si d'un grupu collacios se tratare y d'entamar a pensar que pueden ser un referente pa xente que nin tan siquiera conocen y que los vota dándo-yos una confianza que muches vegaes se ve frañada por asuntos que pal nacionalista independiente son ayenos y difícilmente entendibles.

En definitiva, los partíos políticos asturianos tienen la responsabilidá de normalizar y facer visible'l nacionalismu en toles estayes de la vida asturiana con dignidá, seriedá y respetu p'hacia los sos votantes. Y éstos, el de fuxir de la endogamia que tien el nacionalismu asturianu y el d'amestase a un proyeutu enantes qu'a una sigla.

Y dambos, partíos y votantes, el de facer ver a tola sociedá qu'esta opción ye válida, seria y resolutiva. D'esta miente, algamaráse la presencia nos medios, crearáse l'alderique y saldráse de lo tabú pa convertise n'alternativa visible.

A vueltes col blogue

Ya pasó tiempu dende la última vegada que les tecles del ordenador ficieron por qu'esti blogue tuviere una entraduca más. ¿Por qué? Coses de la falta tiempu,d'un lláu, y de la galbana, per otru.

Pero ya ye tiempu de tornar. Nun soi yo una persona a la que-y preste especialmente'l mundu virtual, les redes sociales (virtuales) o los nomatos usaos pa ferir a los demás faciendo usu d'un anonimatu rastreru.

Esti blogue entamó por un motivu: la señaldá; paró por otru, como dixi enantes: la galbana; y vuelve por otru: el repunu.

Señaldá, cuando ún ta lloñe del llar onde quier tar.

Galbana, cuando'l tiempu pasa, los llugares cambien, la xente marcha.

Repunu, cuando ún, ya tornáu al so país, ve que la indiferencia de la xente, la so falta de criteriu y la manipulación de la so opinión tan más qu'a la orde del día. Y que cuando daquién quier facer por qu'ello camude, entós, surden los vieyos mieos y los inesplicables movimientos que traten de baltiar too aquello qu'arrecienda a asturiano.

Y, aun a pesar de lo virtual d'un blogue, paez necesario tornar. Bones de nuevo.

L'alternativa

«Hay que disolver IU, el Bloque y Los Verdes para crear una fuerza que aglutine a toda la izquierda alternativa al PSOE»

La coalición que fixeron nel so día Izquierda Xunida y el Bloque por Asturies pudo esconsonar ilusiones nun entamu a los que creyeron qu'ello diba derivar nuna verdadera alternativa al PSOE. Por embargu, esta xuntanza nun fizo más qu'esborriar la credibilidá d'IX y sentenciar al BpA. Esti tipu de simbiosis, que tamién se da notres dómines con más ésitu, nun furruló -y nun ta furrulando- n'Asturies. Y ello porque los sos integrantes nunca nun supieron defender los postulaos básicos que dambos glayaben cuando entá yeren solteros. Serán coses del matrimoniu...¡un tien que renunciar a tantes coses pa tener contenta a la otra parte que nengún fai lo que de verdá quier!

El plantegar la disolución d'IX y del Bloque ye una opción acertada si se fai col envís de construir una alternativa creyible a los partidos mayoritarios asturianos.

Esa alternativa tien d'amosar obligatoriamente un cálter conciliador y integrador con tola clas política asturiana nun representada anguañu por partíu políticu dalu y que cae nel mesmu espectru políticu qu'aquella pretende ocupar.Y ye responsabilidá de tolos involucraos l'amosar que se ye capaz de renunciar a munches coses por facer, daveres, un proyeutu grande, seriu y, sobre too, creyible.

La idea de Valledor tien de rescamplar darréu n'IX, Bloque, UNA y Andecha. El saber renunciar, el saber falar, el saber negociar y el saber trabayar xuntos ye lo que vos dará credibilidá y reconocencia y averarávos a la oportunidá qu'Asturies necesita. D'otramiente, toos seremos cómplices y partícipes del fracasu de la alternativa.